कोरोना झाल्यामुळे ऑक्सीजन न मिळाल्याने निधन झालेले पत्रकार संतोष पवार यांच्या योगदानाचे कायम स्मरण रहावे यासाठी उत्कृष्ठ जिल्हा प्रसिद्धी प्रमुख म्हणून सन्मान करणार : एस. एम. देशमुख

 

धुळे (दि.5)-  सर्वोत्कृष्ट काम करणाऱ्या  जिल्हा प्रसिद्धी प्रमुखांना मराठी पत्रकार परिषदेचे दिवंगत सरचिटणीस ‘संतोष पवार उत्कृष्ट जिल्हा प्रसिद्धी प्रमुख’ पुरस्काराने सन्मानित करण्यात येणार असल्याची घोषणा  मराठी पत्रकार परिषदेचे मुख्य विश्वस्त एस.एम.देशमुख यांनी केली. दरवर्षी ३ डिसेंबर रोजी म्हणजे परिषदेच्या वर्धापन दिनी या पुरस्काराची घोषणा करण्यात येईल असे देशमुख यांनी स्पष्ट केले.  मराठी पत्रकार परिषदेने राज्यातील प्रत्येक जिल्हयात एक प्रसिद्धी प्रमुख नियुक्त केला आहे. या जिल्हा प्रसिद्धी प्रमुखांची महत्वाची ऑनलाईन बैठक आज पार पडली. बैठकीत एस.एम.देशमुख यांनी ही घोषणा केली. परिषदेचे विश्वस्त किरण नाईक, अध्यक्ष गजानन नाईक, कार्याध्यक्ष शरद पाबळे यांनी बैठकीस मार्गदर्शन केले. बैठकीस काल 29 जिल्ह्यांचे जिल्हा प्रसिद्धी प्रमुख उपस्थित होते.

पत्रकार संतोष पवार हे माथेरानचे ‘दैनिक सकाळ’चे प्रतिनिधी होते.  त्यांचं स्वतःचे ‘महाराष्ट्र माझा’ नावाचे चॅनल आहे. रायगड प्रेस क्लबचे अध्यक्ष राहिलेल्या संतोष पवार यांनी परिषदेचे कोकण विभागीय चिटणीस आणि मग परिषदेचे सरचिटणीस म्हणून काम केले. राज्य अधिस्वीकृती समितीवरही त्यांनी परिषदेचे  प्रतिनिधी म्हणून काम केले होते.  परिषद भक्कम व्हावी यासाठी त्यांनी मोलाचे योगदान दिलेले आहे. चांगले संघटक असलेल्या संतोष पवार यांना कोरोना झाल्यानंतर ऑक्सीजन न मिळाल्याने काही क्षणातच त्यांचे निधन झाले. त्यांचे योगदान परिषद विसरू शकत नाही. त्यामुळेच त्यांचे कायम स्मरण राहावे यासाठी परिषदेने संतोष पवार यांच्या नावे पुरस्कार देण्याचा निर्णय घेतला आहे. मराठी पत्रकार परिषदेसाठी धडपडणाऱ्या एका कार्यकर्ता पत्रकारांचे स्मरण रहावे म्हणून एस. एम. देशमुख व परिषदेने घेतलेल्या निर्णयाचे राज्यभरातील पत्रसृष्टीकडून स्वागत होत आहे.