🚨 BlaBlaCarवर ‘डेंजर गेम’! लिफ्टच्या बहाण्याने चालकावर जीवघेणा हल्ला; मिरची स्प्रे टाकून लुटण्याचा प्रयत्न – नरडाणा पोलिसांची झटपट कारवाई, २ आरोपी जेरबंद! 🚨

नरडाणा  : ऑनलाईन प्रवासासाठी वापरल्या जाणाऱ्या BlaBlaCar अ‍ॅपचा गैरवापर करत चालकाला जाळ्यात ओढून त्याच्यावर जीवघेणा हल्ला करून लुटण्याचा प्रयत्न केल्याची धक्कादायक घटना नरडाणा परिसरात उघडकीस आली आहे. या प्रकरणात नरडाणा पोलीस स्टेशनने तात्काळ कारवाई करत दोन आरोपींना मुद्देमालासह अटक केली असून तिसरा आरोपी अद्याप फरार आहे.

दि. ११ एप्रिल २०२६ रोजी मध्यरात्री १२.४३ वाजताच्या सुमारास राहुल सपकाळ (रा. नरडाणा, ता. शिंदखेडा) यांनी डायल ११२ वर फोन करून मुंबई-आग्रा महामार्गावर एका कारमध्ये तीन जण एका व्यक्तीस मारहाण करत असल्याची माहिती दिली. माहिती मिळताच पोलीस कर्मचारी योगेश गिते व अजय सोनवणे यांनी तात्काळ घटनास्थळी धाव घेतली. मात्र पोलिसांना पाहताच आरोपी अंधाराचा फायदा घेऊन पसार झाले.

घटनास्थळी सापडलेल्या तनुष राजेश तोमर (वय २६, मूळ भोपाल, सध्या नवी मुंबई) यांनी दिलेल्या माहितीनुसार, त्यांनी BlaBlaCar अ‍ॅपवरून प्रवासी घेतले होते. नाशिक येथून ‘राजू’ नावाच्या व्यक्तीसह आणखी दोघांना कारमध्ये बसवण्यात आले होते.

प्रवासादरम्यान एका आरोपीने उलटी करण्याचा बहाणा करून कार थांबवण्यास भाग पाडले. त्यानंतर आरोपींनी चालकाच्या डोळ्यात मिरची स्प्रे फेकून त्याचे हात-पाय बांधले आणि चाकू व पिस्टलचा धाक दाखवत त्याच्याकडून कार व पैसे हिसकावण्याचा प्रयत्न केला. चालकाने प्रतिकार करताच त्याला बेदम मारहाण करण्यात आली आणि त्याच्या खिशातील ५,००० रुपये जबरदस्तीने काढून घेण्यात आले.

तक्रारीनंतर नरडाणा पोलिसांनी तात्काळ शोधमोहीम राबवत नरडाणा रेस्टहाऊस मागील शेत परिसरात संशयितांचा पाठलाग करून दोन आरोपींना पकडण्यात यश मिळवले. अटक करण्यात आलेल्या आरोपींची नावे गजानन शिवकुमार शर्मा (वय २८, रा. ठाणे) व अभिनव पप्पू शर्मा (वय १९, रा. उत्तरप्रदेश) अशी आहेत.

आरोपींकडून ५,००० रुपये रोख, एक नकली पिस्टल, चाकू, मिरची स्प्रे, दोरीचे तुकडे व मोबाईल असा सुमारे १५,००० रुपयांचा मुद्देमाल जप्त करण्यात आला आहे. या प्रकरणी भारतीय न्याय संहिता २०२३ अंतर्गत गुन्हा दाखल करण्यात आला आहे.

ही धाडसी कारवाई पोलीस अधीक्षक श्रीकांत धिवरे, अपर पोलीस अधीक्षक अजय देवरे व उपविभागीय पोलीस अधिकारी विश्वजीत जाधव यांच्या मार्गदर्शनाखाली सहाय्यक पोलीस निरीक्षक निलेश मोरे यांच्या नेतृत्वाखालील विजय पाटील ,अजय सोनवणे, योगेश गिते, ललित पाटील, राकेश शिरसाठ, नारायण गवड़ी, चंद्रकांत साळुंके, रविन्द्र मोराणी स, गणेश पाटील,विजय माळी, गणेश, प्रशांत पा,अर्पण मोरे, दिपक भामरे, किशोर कोळी, सचिन बागुल, अनिल सोनवणे,पंकज भाई, सुनील पगारे,भरत पगारे, जितेन्द्र रणदिवे या पथकाने यशस्वीरीत्या पार पाडली.

👉 ऑनलाईन अ‍ॅपद्वारे प्रवास करताना सतर्क राहा, अनोळखी प्रवाशांवर विश्वास ठेवताना खबरदारी घ्या, असे आवाहन पोलिसांनी नागरिकांना केले आहे.