मुडावद येथील त्रिवेणी संगमावरील तीर्थक्षेत्र कपिलेश्वर महादेवाचे पर्यटकांना खुणावतेय. आज दुसरा श्रावण सोमवार• १७ व्या शतकातील मंदिर; १६ दगडी स्तंभावर सभामंडप, सकाळचे सूर्यकिरण पडते पिंडीवर

 बेटावद---  (राहुल जी पवार,) तापी व पांझरा आणि गुप्त कपिल गंगा या नद्यांच्या त्रिवेणी संगमावर वसलेल्या मुडावद येथील अतिप्राचीन तीर्थक्षेत्र कपिलेश्वर महादेव मंदिर श्रावण मास निमित्त सज्ज आहे. श्रावण मास निमित्त दरवर्षी विविध कार्यक्रम या ठिकाणी 

होतात. धुळे आणि जळगाव जिल्ह्याच्या सीमेवर असलेल्या या ठिकाणी श्रावणात भाविकांची मोठी रीघ लागलेली असते.व मुडावद येथे कपिलेश्वर महादेव मंदिर प्रसिद्ध आहे. तीन नद्यांच्या त्रिवेणी संगमावर असलेल्या या महादेव मंदिरावर दर महिन्याच्या संक्रांत तिथीवर उत्सव साजरा केला जातो. कपिलमुनी ऋषींच्या तपसाधनेने ही भूमी पवित्र असल्याची मान्यता आहे. श्रावण महिन्यात तापीमाईची विधिवत पूजा व श्री महादेव पूजन, अभिषेक कार्यक्रम दररोज होतात. सकाळी सात वाजता पर्व स्नान, नऊ वाजता तापी मातेची महाआरती होत असते. संपूर्ण खानदेशच नव्हे तर गुजरात मध्य प्रदेश येथील भाविक या ठिकाणी येऊन श्री महादेव जलाभिषेक नेहमीच करीत असतात. या शिवाय प्रवचन, पूजा,आरत्या,मानता,नवस आदी कार्यक्रम या  तीर्थक्षेत्रावरती संपन्न होतात. तसेच अनेक दाते महाप्रसादाचे देखील आयोजन करीत असतात.

कपिलेश्वर मंदिराला शेकडो वर्षांची परंपरा आहे. या ठिकाणी कपिलमुनी यांनी तपश्चर्या करून महादेव पिंडीची स्थापना केली. मंदिराचे बांधकाम १७ व्या शतकात झाले आहे. कोरीव नक्षीकाम आहे. मंदिराच्या सभा मंडपाची रचना आकर्षक आहे. तिन्ही दिशांनी प्रवेशद्वार आहे. प्रत्येक मार्गावर प्रवेशद्वार आहे. १६ दगडी स्तंभावर सभामंडप आहे. मंदिराच्या समोर उंच दीपमाळ आहे. समोरून तापी नदी, मागे पांझरा नदी वाहते, चौफेर निसर्गरम्य व आल्हादायक वातावरण आपणास दिसते. मंदिर गाभाऱ्यात तीन शिवलिंग आहेत. सकाळचे सूर्यकिरण पिंडीवर पडतो. पुण्यश्लोक अहिल्याबाई होळकर यांनी या  मंदिराचा जीर्णोद्धार केला आहे. तसा शिलालेख आढळून येतो.