धुळे--महामार्गावरील दरोड्याचा डाव स्थानिक गुन्हा शाखेच्या पथकाने रविवारी (ता. ४) उधळून लावला. दरम्यान, यातील चार संशयित पळून जाण्यात यशस्वी झाले. विधिसंघर्षित बालकाला पोलिसांनी ताब्यात घेतले.
घटनास्थळावरून पोलिसांनी गावठी कट्ट्यासह दरोड्यासाठीचे साहित्य, कार असा सव्वा लाखाचा मुद्देमाल जप्त केला. या प्रकरणी मोहाडी पोलिस ठाण्यात पाच जणांविरुद्ध गुन्हा दाखल झाला.
गरताड (ता. धुळे) बारीत कारसह पाच जण उभे असल्याची खात्रीशीर माहिती 'एलसीबी'चे पोलिस निरीक्षक दत्तात्रय शिंदे यांना मिळाली.
त्यानुसार पथक गरताड बारीत दाखल झाले. पथकाला पाहून अल्टो कार (एमएच १५, बीडी ५८३१) सोडून तेथे उभे चौघे अंधाराचा फायदा घेऊन जंगलात पळून गेले. पथकाने कारची तपासणी केली असता वाहनात एक विधिसंघर्षित बालक (रा. मोहाडी, धुळे) आढळले.
कजगाव (ता. भडगाव, जि. जळगाव) येथे दरोडा टाकण्याच्या उद्देशाने बहाळ येथून ही कार चोरल्याचे तपासात निष्पन्न झाले. कारमध्ये चोरी, घरफोडी व दरोडा टाकण्यासाठी लागणारे साहित्य तसेच मिरचीपूड, पेट्रोल कॅन, गावठी कट्टा, दोन जिवंत काडतुसे, दोन कटर.
दोन स्क्रू ड्रायव्हर, दोन लोखंडी टॉमी, कात्रीचे दोन भागांत विभाजन केलेले सहा नग असे साहित्य आढळले. या साहित्यासह एक लाख रुपये किमतीची कार असा एकूण एक लाख ३४ हजारांचा मुद्देमाल पोलिसांनी जप्त केला.
दहा गुन्ह्यांची उकल
विधिसंघर्षित बालकाने यापूर्वी केलेल्या गुन्ह्यांच्या माहितीसह पळून गेलेल्या त्याच्या साथीदारांची नावे सांगितली. त्यानुसार वरुणसिंग टाक (रा. दाहोद, गुजरात), मुकुंदर जुनी (रा. नदीजवळ, नंदुरबार), आकाश मांग (रा. नदीजवळ, नंदुरबार) व वरुणसिंग टाक याचा मित्र यांच्यासोबत गुन्हे करीत असल्याचे त्याने सांगितले.
३१ जानेवारीला कोळगाव (ता. भडगाव) येथून वॅगनर कार चोरल्याचे, १ व २ फेब्रुवारीदरम्यान गोंडगाव येथे मेडिकल दुकानातून रोकड चोरली, भऊर (ता. चाळीसगाव) गावाजवळ कारचे पेट्रोल संपल्याने कार तेथेच सोडून बहाळ गावातून अल्टो कार चोरी केली.
तसेच ऑक्टोबर २०२३ मध्ये कावठी (ता. साक्री) गावात, डिसेंबर २०२३ मध्ये दिघावे (ता. साक्री) येथे, धुळे शहरातील बुशरा कॉलनीत, जानेवारीत कासारे, छडवेल पखरून व किरवाडे (ता. साक्री) येथे चोऱ्या केल्याची त्याने कबुली दिली.
मेहुणबारे पोलिस ठाण्यात दाखल अल्टो कार (एमएच १५, बीडी ५८३१) चोरीचा गुन्हा, पारोळा पोलिसांत दाखल दुचाकी (एमएच १८, सीसी ७६५३) चोरी, भडगाव पोलिसांत दाखल वॅगनर कार (एमएच १९, एई ४९२६) चोरी, साक्री पोलिसांत दाखल पाच घरफोडीचे, चाळीसगाव रोड पोलिसात दाखल घरफोडी अशा एकूण दहा गुन्ह्यांची पोलिसांनी यातून उकल केली.
पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या यांच्या मार्गदर्शनाखाली एलसीबीचे पोलिस निरीक्षक शिंदे, बाळासाहेब सूर्यवंशी, संजय पाटील, श्याम निकम, दिलीप खोंडे, मच्छिंद्र पाटील, संदीप पाटील, संदीप सरग, हेमंत बोरसे, योगेश चव्हाण, संतोष हिरे, प्रल्हाद वाघ.
अशोक पाटील, प्रकाश सोनार, तुषार सूर्यवंशी, देवेंद्र ठाकूर, योगेश साळवे, गुणवंत पाटील, हर्शल चौधरी, नितीन मोहने, जगदीश सूर्यवंशी, सुशील शेंडे, कमलेश सूर्यवंशी, नीलेश पोतदार, राजीव गिते, कैलास महाजन यांच्या पथकाने ही कारवाई केली.
0 Comments