**दोंडाईचा येथे जैन सोशल ग्रुपतर्फे राणीमाँसाहेब राऊळ गर्ल्स हायस्कूलच्या विद्यार्थिनींना वह्यांचे वाटप**

*दोंडाईचा श्री पांडुरंग शिंपी प्रतिनिधी यांचेकडून*

शैक्षणिक व सामाजिक क्षेत्रात सदैव अग्रेसर असणाऱ्या जैन सोशल ग्रुपतर्फे स्थानिक स्वोद्धारक विद्यार्थी संस्थेच्या 'राणीमाँसाहेब मनुबादेवी राऊळ गर्ल्स हायस्कूल व ज्युनियर कॉलेज' मधील गरजू आणि होतकरू विद्यार्थिनींना मोफत वह्यांचे वाटप करण्यात आले.

कार्यक्रमाच्या सुरुवातीला उपस्थित मान्यवरांच्या हस्ते विद्यादेवता सरस्वती मातेच्या प्रतिमेचे पूजन करण्यात आले. यानंतर शालेय प्रशासनातर्फे जैन सोशल ग्रुपच्या सदस्यांचा सत्कार करण्यात आला.

**प्रमुख उपस्थिती व मान्यवर**

या कार्यक्रमास प्रमुख पाहुणे म्हणून जैन सोशल ग्रुपचे सदस्य सुनील पारख, अनिल पारख, प्रदीप पारख, भावेश जैन आणि दिनेश कर्नावट उपस्थित होते. कार्यक्रमाच्या अध्यक्षस्थानी महाविद्यालयाच्या प्राचार्य श्रीमती एस. एन. पाटील मॅडम तसेच ज्येष्ठ शिक्षक-शिक्षिका व्यासपीठावर उपस्थित होत्या.

**शिक्षणाचे महत्त्व आणि मार्गदर्शन**

उपस्थित मान्यवरांनी आपल्या मनोगतातून विद्यार्थ्यांना मार्गदर्शन करताना सांगितले की, "शिक्षणासाठी बिकट परिस्थिती कधीही अडसर ठरू शकत नाही. अविरत प्रयत्न आणि जिद्दीच्या जोरावर यश नक्कीच मिळवता येते."

प्राचार्य श्रीमती एस. एन. पाटील यांनी जैन सोशल ग्रुपच्या या उपक्रमाचे कौतुक करत सांगितले की, "मिळालेल्या वह्यांमुळे विद्यार्थिनींना शैक्षणिक मदत होऊन त्यांचा प्रगतीचा आलेख नक्कीच उंचावेल."

**संस्थेच्या पदाधिकाऱ्यांकडून कौतुक**

जैन सोशल ग्रुपच्या या स्तुत्य उपक्रमाबद्दल स्वोद्धारक विद्यार्थी संस्थेचे अध्यक्ष मा. सरकारसाहेब रावल, महाराष्ट्राचे कॅबिनेट मंत्री मा. जयकुमारभाऊ रावल, स्कूल कमिटी चेअरमन कुवरराणी साहेब सुभद्रादेवी रावल, संस्थेचे सेक्रेटरी सी. एन. भाऊसाहेब आणि शालेय प्रशासन सचिव मा. ललितसिंह गिरासे यांनी समाधान व्यक्त करत ग्रुपचे विशेष कौतुक केले.

**अत्यंत उत्साहात सोहळा संपन्न**

कार्यक्रमाचे प्रास्ताविक गणेश गिरासे यांनी केले, तर प्राचार्या श्रीमती एस. एन. पाटील व पर्यवेक्षक श्री आर. के. सोनवणे यांनी आभार मानले. या कार्यक्रमाच्या समन्वयाची जबाबदारी ए. एच. महाजन यांनी यशस्वीरीत्या सांभाळली. शिक्षक व शिक्षकेतर कर्मचाऱ्यांच्या सहकार्याने हा कार्यक्रम अत्यंत उत्साहपूर्ण वातावरणात पार पडला. वह्या मिळाल्यामुळे विद्यार्थिनींच्या चेहऱ्यावर आनंदाचे वातावरण दिसून येत होते.