आरटीओ: पैशांचा पाऊस नव्हे, नोटांची ढगफुटी!महामार्गावरील कथित वसुलीविरोधात ट्रकचालक आक्रमक; वाढत्या चलनांमुळे संतापाचा उद्रेक

धुळे | प्रतिनिधी

राज्यातील महामार्गांवर आरटीओ विभागाच्या कथित वसुलीच्या तक्रारी दिवसेंदिवस वाढत असून, या प्रकारामुळे ट्रकचालकांमध्ये तीव्र नाराजी निर्माण झाली आहे. समृद्धी महामार्गावर आरटीओच्या कारवाईला वैतागलेल्या एका ट्रकचालकाने कंटेनर रस्त्यावर आडवा लावून अनोख्या पद्धतीने निषेध केल्याने काही काळ वाहतूक ठप्प झाली. या घटनेनंतर आरटीओ विभागाच्या कार्यपद्धतीवर राज्यभरातून प्रश्न उपस्थित केले जात आहेत.

कागदपत्रे पूर्ण असतानाही ₹१४ हजारांचे चलन करण्यात आल्याचा आरोप संबंधित चालकाने केला. ट्रक थांबवण्यामागे किरकोळ कारण असतानाही कारवाई केली जाते, अशी त्याची तक्रार होती. या प्रकारामुळे संतप्त झालेल्या चालकाने महामार्गावर कंटेनर उभा करून निषेध केला. काही काळानंतर तो आरटीओ अधिकाऱ्यांसमोर हजर झाला. राष्ट्रीय परवान्याच्या वाहनातून नागपूरहून पुण्याला माल वाहतूक केल्याच्या कारणावरून चलन केल्याचे सांगण्यात आले. दरम्यान, या प्रकरणात ट्रकचालकावरच गुन्हा दाखल झाल्याने प्रकरणाला वेगळे वळण मिळाले.

ही एकच घटना नसून महामार्गांवरील आरटीओ कारवाईबाबत सोशल मीडियावर विविध व्हिडिओ आणि तक्रारी मोठ्या प्रमाणावर समोर येत असल्याचा दावा केला जात आहे. परिवहन विभागातील कथित भ्रष्टाचार आणि अनधिकृत वसुलीवर कठोर कारवाई करण्याची मागणी सातत्याने होत आहे.

आरटीओच्या कथित वसुलीचा थेट परिणाम सर्वसामान्य ग्राहकांच्या खिशावर होत असल्याचेही या प्रश्नाचे गांभीर्य वाढवणारे कारण आहे. ट्रक वाहतुकीचा खर्च, हमाली, इंधन आणि इतर खर्चांबरोबरच अनधिकृत वसुलीचा भार मालाच्या अंतिम किमतीत समाविष्ट होण्याची शक्यता असते. त्यामुळे महामार्गावरील कथित वसुली ही केवळ ट्रकचालकांची समस्या नसून त्याचा अप्रत्यक्ष फटका सामान्य ग्राहकांनाही बसतो.

दरम्यान, राजस्थानसह अन्य राज्यांमध्येही आरटीओच्या कथित वसुलीविरोधात ट्रकचालकांच्या आंदोलनाच्या घटना समोर येत आहेत. काही ठिकाणी भ्रष्टाचारविरोधी पथकांच्या कारवायांमध्ये खासगी व्यक्तींमार्फत वसुली केल्याचे प्रकार उघडकीस आल्याचे वृत्त आहे.

मोबाईल कॅमेऱ्यामुळे आता महामार्गावरील प्रत्येक हालचालीचे चित्रीकरण करणे चालकांना शक्य झाले आहे. त्यामुळे आरटीओ अधिकारी किंवा त्यांच्या नावाने वसुली करणाऱ्या व्यक्तींविरोधातील व्हिडिओ सोशल मीडियावर मोठ्या प्रमाणात व्हायरल होत आहेत.

आरटीओ विभाग हा कायदा व वाहतूक नियमांची अंमलबजावणी करणारा महत्त्वाचा विभाग आहे. त्यामुळे नियमभंग करणाऱ्यांवर कारवाई होणे आवश्यकच आहे; मात्र कारवाई पारदर्शक आणि नियमांनुसार झाली पाहिजे. कथित अनधिकृत वसुलीच्या तक्रारींची निष्पक्ष चौकशी करून दोषी आढळणाऱ्यांवर कठोर कारवाई करावी, अशी मागणी आता जोर धरत आहे.

नियमभंगावर कारवाई करा; पण कथित वसुलीला आळा घाला, अशीच महामार्गावरील वाहनचालकांची अपेक्षा आहे.