*सी. बी. देसले विद्यालय, भडणे येथे 'अभिजात मराठी भाषा गौरव दिन' उत्साहात साजरा; 👉मुख्याध्यापक एस. ए. वाडिले यांचे प्रतिपादन*

 शिंदखेडा ( यादवराव सावंत )प्रतिनिधी :

"मराठी भाषेला लाभलेला अभिजात भाषेचा दर्जा हा महाराष्ट्राच्या समृद्ध भाषिक व सांस्कृतिक परंपरेचा ऐतिहासिक सन्मान आहे. या अभिमानासोबतच मराठी भाषेचा दैनंदिन व्यवहारात अधिकाधिक वापर करून तिचे संवर्धन करण्याची जबाबदारी प्रत्येक मराठी भाषिकाची आहे," असे मोलाचे प्रतिपादन सी. बी. देसले विद्यालय, भडणेचे मुख्याध्यापक एस. ए. वाडिले यांनी केले.

भडणे येथील सी. बी. देसले विद्यालयात शनिवारी (दि. ३ ऑक्टोबर २०२६) 'अभिजात मराठी भाषा गौरव दिन' अत्यंत उत्साहात साजरा करण्यात आला. कार्यक्रमाच्या अध्यक्षस्थानी स्थानिक शालेय समितीचे चेअरमन भबुतराव देसले हे होते.

 मार्गदर्शनादरम्यान मुख्याध्यापक एस. ए. वाडिले यांनी स्पष्ट केले की, २७ फेब्रुवारी हा कवी कुसुमाग्रज यांच्या जन्मदिनानिमित्त 'मराठी भाषा गौरव दिन' म्हणून साजरा केला जातो; तर ३ ऑक्टोबर हा मराठीला 'अभिजात भाषेचा' दर्जा मिळाल्याच्या ऐतिहासिक सन्मानाची आठवण करून देणारा दिवस आहे. महाराष्ट्रात ३ ते ९ ऑक्टोबरदरम्यान 'अभिजात मराठी भाषा सप्ताह' साजरा करून मराठीच्या समृद्ध परंपरेचा जागर केला जातो. मराठीला अभिजात दर्जा मिळणे म्हणजे तिच्या प्राचीनतेला, साहित्यिक परंपरेला आणि समृद्ध वारशाला मिळालेली अधिकृत मान्यता आहे. हा गौरव केवळ औपचारिकता किंवा कार्यक्रमांपुरते मर्यादित न राहता आपल्या आचरणात दिसला पाहिजे. घरात, शाळेत, कार्यालयीन व्यवहारात आणि सामाजिक जीवनात मराठीचा अभिमानाने वापर करणे आवश्यक आहे. भाषेचे संवर्धन हे केवळ शासनाचे नसून प्रत्येक नागरिकाचे कर्तव्य असल्याचे त्यांनी सांगितले. संस्थेचे अध्यक्ष साहेबराव सरकार, उपाध्यक्ष वाल्मिक पाटील आणि सचिव प्रकाश पाटील यांनी विशेष दूरध्वनीद्वारे (भ्रमणध्वनीवरून) विद्यार्थ्यांशी संवाद साधून त्यांना मार्गदर्शन व शुभेच्छा दिल्या.

कार्यक्रमात विद्यार्थ्यांना मराठी भाषेतील संतसाहित्य, लोकसाहित्य, काव्यपरंपरा आणि आधुनिक साहित्याची ओळख करून देण्याचे महत्त्व अधोरेखित करण्यात आले. तसेच आजच्या डिजिटल युगात मोबाईल व सोशल मीडियावर (संचल माध्यमांवर) मराठीचा शुद्ध, प्रभावी व सर्जनशील वापर वाढवण्याची गरज यावेळी व्यक्त करण्यात आली.

कार्यक्रमाच्या यशस्वीतेसाठी ज्येष्ठ अध्यापिका श्रीमती संगीता वेंदे, रावसाहेब बैसाणे, मनोहर पाटील, जितेन्द्र अहिरे, जीवन पाटील, संजयकुमार महाजन, निलेश पाटील तसेच शिक्षकेतर कर्मचारी श्रीमती अलका सूर्यवंशी, शरद पवार आणि निलेश पवार यांनी विशेष परिश्रम व सहकार्य केले.